" आपण असतो,त्यापेक्षा जास्त सुंदर दिसतो..असा मोबाईल..!"☺

मला प्रवासात भेटलेली माणसं..!

" आपण असतो,त्यापेक्षा जास्त सुंदर दिसतो..असा मोबाईल..!"☺
===================================

माझ्या मोबाईलची तब्येत काही दिवसापासून अस्वस्थ आहे.तांत्रिक क्षेत्रातील विविध उपचार केले पण त्याचा मूळ आजार काही बरा होईना..!दिवसेंदिवस माझ्या मोबाईलची तब्येत आणखीनच अस्वस्थ होत आहे,म्हणून मी नवीन मोबाईल खरेदी करण्यासाठी तीनदा Amazon वर मोबाईल बुक केला..! पण..तीनदा बुक करूनही...
" मी Amazon च्या आवाक्यात राहत नाही..!" असे थातुर मातुर उत्तर देऊन  मी औरंगाबाद शहरात राहून देखील माझ्या घरी बुक केलेला मोबाईल आला नाही..!☺

अखेर सौम्य स्वरूपातील वैताग येऊन मी  काल दिनांक
४ नोव्हेंबर २०१९ रोजी औरंगाबाद शहरातील एका  भारी मोबाईल दुकानात गेलो.जसा एखादा होणारा नवरदेव, समोर बसलेल्या पाहुण्यांना आपल्या आवडी निवडी सांगतो त्याप्रमाणे मी ही माझ्या आवडी निवडी मोबाईल दुकानदाराला सांगितल्या..!☺

सुरुवातीला तो दुकानदार हिंदीत बोलायला लागला.मी त्यांना नम्र भाषेत सांगितले की," भाऊ, कृपया मराठीत बोला राव..!"
यावर तो गालातल्या गालात हसला अन् मराठीत माझ्याशी बोलू लागला..!
मोबाईल दुकानदार मला म्हणाला-" तुम्हाला फोटो चांगला येणारा हवा की...ताकदीचा..?"
मी-" माझे मोबाईलवर लिखाण काम जास्त असते,तेंव्हा ताकदीचा असेल तर दाखवा..!"
दुकानदाराने विविध ताकदीचे मोबाईल दाखवले.मी आस्थेवाईकपणे सर्व ताकदीचे मोबाईल पाहून घेतले..! यानंतर तो दुकानदार मला म्हणाला....
" चांगले फोटो येणारे पण मॉडेल आहेत,दाखवू का..?"
मी-" दाखवा,पाहायला काय जाते..?" अशा मिश्किल स्वरात मी म्हणालो.
माझा मिश्किल रोख पाहून तो दुकानदारही मिश्किल स्वरात म्हणाला...
" माझ्या कडे असे काही मोबाईल आहेत,त्यात आपण असतो,त्यापेक्षा जास्त सुंदर दिसतो..! ते दाखवू का..?"
मला आश्चर्य वाटले..आपण दिसतो त्यापेक्षा सुंदर दाखवणारा मोबाईल पाहायचे कुतूहल निर्माण झाले..!
दुकानदाराने जे मोबाईल माझ्या समोर मांडले होते,त्याच मोबाइलद्वारे माझ्या परिचयाच्या अनेक फेसबुक मित्रांचे फोटो मी ,फेसबुकवर पाहिले होते..!☺कारण ब्रँडचे नाव दिसले होते त्यावर..!☺ अर्थात  आपण असतो,त्यापेक्षा जास्त सुंदर दिसतो..या मोबाईलचे नाव मी काही इथे सांगणार नाही..!☺ कारण ज्यांच्याकडे ते मॉडेल आहे ,त्यांच्या नाहक भावना दुखून ते सतत अधून मधून स्वतः ला आरशात बघत बसतील..!☺

मला लगेच दुसरे कुतूहल निर्माण झाले की,आपण दिसतो त्यापेक्षा सुंदर दाखवणारा मोबाईलवर ज्या ज्या माझ्या फेसबुक मित्रांनी फोटो काढले होते,त्यांना कधी एकदाचा प्रत्यक्ष अथवा पुन्हा भेटेन याचे..!☺

मी सगळं पाहून घेतले अन् त्या दुकानदाराला म्हणालो की,
" आपण दिसतो त्यापेक्षा सुंदर दाखवणारा मोबाईल..!" अशीच एखादी जाहिरात या मोबाईलच्या कंपनीने प्रदर्शित नक्कीच करायला हवी..! लई खप वाढेल...याची हमी मी देतो..! या मोबाईलच्या मॉडेल ला पाहून याला खरेदी करणारा तारुण्यसुलभ तरुण नक्कीच म्हणेल की,
" मी पुन्हा येईन..!मी पुन्हा येईन..!! मी पुन्हा येईन..!!!"
यावर त्या दुकानदाराला खूप हसू आले..!तो दुकानदार मला म्हणाला...
" माझ्या दुकानात जवळ जवळ सर्वच गिऱ्हाईक हिंदीत बोलणारे येतात..! तुम्ही सगळं कसं मराठीत बोलले..ते ऐकून अन् पाहून आनंद वाटला..! येत जा..अधून मधून..गप्पा मारायला..!"☺

मी खूप मोबाईल पाहून शेवटी पुन्हा  Amazon किंवा flipcart वरच शेवटची एक आवड मागवून घेण्याचे ठरवले अन् निघालो त्या दुकानातून..! निघताना त्या दुकानदाराला म्हणालो की,
"मी पुन्हा येईन..!मी पुन्हा येईन..!! मी पुन्हा येईन..!!!"☺

वंदे मातरम्..!
प्रवासी लेखक: नंदन शोभाबाई विष्णुपंत जाधव पालखेडवाले.
https://jadhavnandan.blogspot.com/?m=1

दिनांक:५/११/१९, मंगळवार.
स्थळ: प्रोझोन मॉल, औरंगाबाद.