" ती..!"

 

चिंतन

                        " ती...! "

===================================

आज दिनांक ८ जुलै २०१८ रोजी भल्या सकाळी आम्ही N3...एका निवांत स्थळी,एका अंतर्गत रस्त्यावर..!

सोबतीला होती..ती..!

तब्बल दहा वर्षांपासून तिने मला भल्या सकाळी दररोज लासुर स्टेशन पासून ते आजतागायत अगदी निष्ठेने साथ दिली आहे..!अर्थात त्या पूर्वीही असेच साथ देणारे होते...पण..तुझ्या इतका दीर्घ सहवास..इतर कुणालाही माझ्या बरोबर निभावता आलाच नाही..!

ती सकाळी सोबत नसली की...अख्खा दिवस आळसात जातो..!इतकं तीच अन् माझं नात घट्ट जुळलं आहे..!

एका चिमुकल्याला त्याच्या या भूतलावर आगमनाच्या वेळी तू आपल्या कवेत घेऊन मायेची ऊब दिली आहे हे कसे विसरू मी..?

तर अशी ती..! 

जीने मला दररोज भल्या सकाळी साथ दिली..ती काळाच्या ओघात अस्वस्थ होत चालली आहे..! पण काय करणार तुझं अन् माझं इतकं नात घट्ट जुळले आहे की,तुला एखाद्या भल्या सकाळी जर सोबत नाही घेतले तर.. तो संपूर्ण दिवस..खूप आळसाचा,कंटाळवाणा जातो..!

तुझा रंग काळा सावळा आहे..! काळा सावळा रंग..हा मध्यमवर्गीयांना( सौंदर्याने मध्यमवर्गीय..!) हवाहवासा वाटणारा रंग..!त्या रंगाला ना कधी अहंकाराचा गर्व चढतो...ना कधी...न्यूनगंड..! तो नेहमी समांतर असतो..आपल्या आयुष्यात..! अर्थात सर्वच धवल रंग गर्वाचे असतात असे कदापि नाही बरं का..! ते ही खूप चांगले असतात..! सखे, तू आता तुझ्या वयोमानानुसार हळूहळू तुझ्या वार्धक्याकडे चालली आहेस,पण तुझ्या त्याही वार्धक्यातील सौंदर्यावर मी अविरत प्रेम करत राहणार याबाबतीत तू निश्चिंत राहा..! सखे, तू होतीस म्हणून आज मी जसा आहे तसा असतो..! सखे, तू नसती तर मीही माझ्या देहाच्या व्याधींना कधीचेच कवटाळून बसलेलो असतो..! अर्थात माझ्याही देहाला आयुष्याच्या प्रवासात कधी ना कधी तरी व्याधी जडणाराच..! पण माझ्या वार्धक्यातील त्या व्याधींवर देखील तू प्रेम करतच राहशील याची खात्री वाटते, कारण तुच तर माझी पहाटेची, सकाळची प्रिय सखी आहेस..!

कित्येक वर्षांपासून तू माझी प्राणपणाने साथ दिली आहे..भल्या सकाळी..! आता एकच आशा करतो की,तुझी अशीच साथ जी..लासूर स्टेशन येथे भल्या सकाळी लासूरगाव रोड वरील आदरणीय मांगीलाल शेठ यांच्या बंद पडलेल्या बर्फाच्या कारखान्याचा ओटा असो...कधी भानवाडी रस्त्याला असणारे स्व.हारकचंदजी छाजेड कांदा मार्केट चे प्रशस्त मैदान असो...त्या..त्या सर्व ठिकाणी तूच मला माझे आज पर्यंतचे आरोग्य निरामय ठेवण्यास खूप मदत केली आहे ..तशीच यापुढेही असू दे..!

माझ्या घरातील पुढील पिढी तुझा उपयोग करून आपला स्वार्थ साधेल की नाही याबाबत काही सांगता येणार नाही..! आशा करूया ते तुझा किंवा तुझ्या कुळातील पुढील वारशांचा नक्कीच उपयोग करतील..त्यांच्या स्वतच्या भविष्याकरिता..! पण यात मला शंका वाटते ,कारण आजची पिढी " मॉडर्न " आहे..!☺

तुझी तब्येत काळाच्या ओघात अस्वस्थ होत आहे याची मला जाणीव आहे..सखे..! पण काय करणार माझा मुळात स्वभाव कृतघ्न नाही गं...! मी तुला , जो पर्यंत तुझ्यात शेवटचा श्वास असेल तो पर्यंत सांभाळणार..!कारण तुझ्यामुळे माझे आजचे स्वास्थ बरे आहे..!उद्या किंवा वयोमानारूप ते पुढे कसे होईल हे त्या नियंत्यालाच माहीत..!

 

" गोड फळाला कीड लवकर लागते..!" असे एक वचन महान लेखक वि.स.खांडेकर लिखित " ययाती " या पुस्तकात मी बऱ्याचदा वाचले आहे..! माणसाला उद्देशून खांडेकरांनी हे सुवचन लिहिले होते, आणि मी माणूस आहे..! पण तरीही एक मात्र नक्की की,ते माझे भविष्यातील शारीरिक रूप कसेही असू दे..! तू मात्र माझ्या सदैव स्मरणात राहशील..! जरी अत्यवस्थ अवस्थेत झाली तरीही तू नेहमी माझ्या घरात राहशील..!

अशी ती माझी प्राण प्रिय शाल..!

याच शालीत माझा धाकटा मुलगा चि.नयन याचा तब्बल दहा वर्षापूर्वी जन्म झाला होता,त्यावेळी त्याला इच्यातच गुंडाळून पहिल्यांदा आणले होते..! बाळाच्या कामातील तुझा उपयोग संपल्यावर मी याच शालीवर बसून भल्या सकाळी मी दररोज काही योगासने ,त्रोटक व्यायाम करत आहे..! अर्थात पूर्वीही करत होतो..पण " ती " ही त्यावेळी सोबत नव्हती..! सदरील छायाचित्रात " ती " माझ्या खांद्यावर विसावलेली आहे..!☺ कुणावर तरी निष्ठेने अन् चिरंतन प्रेम करावं या सिध्दांतावर माझी श्रद्धा आहे ग सखे..! 🌹

ता.क. - सुरुवातीला शृंगारिक वाटणारे पण.....

नंतर एखाद्या रेशमाच्या दोऱ्याचा गुंता उलगडत जावा..असे उत्कंठावर्धक लेखन प्रकारातील एक छोटासा प्रयत्न..केला आहे..!

कृपया वाचकांनी निर्भेळ वाचनाचा शृंगारिक पण कृतज्ञता मूल्याचा आनंद घेत...घेत वाचावे..!

वाकड्यात शिरू नये..!🙏😊

वंदे मातरम्..!

लेखक : नंदन शोभाबाई विष्णूपंत जाधव पालखेडवाले.

https://jadhavnandan.blogspot.com/?m=1

(© सदरील लेख कॉपीराइट केलेला असून लेखाचे संपूर्ण हक्क लेखकाकडे आहेत.)

दिनांक : ८ जुलै २०१८

स्थळ: औरंगाबाद.