पिंजऱ्यातला मास्तर अन् मीनाकुमारी एक विलक्षण योगायोग..!

 

चिंतन ©️

पिंजऱ्यातला मास्तर अन् मीनाकुमारी एक विलक्षण योगायोग..!

=============================

महजबींन बानो उपाख्य मीना कुमारी अन् व्ही. शांताराम यांच्या पिंजरा या मराठी चित्रपटातील मास्तर, ही दोन्ही व्यक्तिमत्वे आपापल्या दुर्दैवाचे प्रतिनिधीत्व करत राहिली. या दोन्ही व्यक्तिमत्त्वांना मदिरा ( दारू ) अन् मीनाक्षीने ( स्री ) आपापल्या आयुष्यातून पुरते उध्वस्त केले. महजबींन बानो उपाख्य मीना कुमारीला मानसिकरीत्या उध्वस्त करायला तिचे वैवाहिक आयुष्य देखील निमित्त ठरले.

पिंजरा चित्रपटातील मास्तर अन् महजबींन बानो उपाख्य मीना कुमारी या दोन व्यक्तिरेखा फक्त त्यांच्या पुरत्याच मर्यादित नव्हत्या तर त्यांनी त्याकाळच्या, आजच्या अन् भविष्यातील समाजव्यवस्थेतील अनेक व्यक्तिरेखांचे प्रतिनिधीत्व केले, करत आहे अन् करत राहतील.

नियतीचा योगायोग पहा, ज्यादिवशी महजबींन बानो उपाख्य मीना कुमारी मृत्यू पावली अगदी त्याच दिवशी व्ही. शांताराम यांचा मराठी चित्रपट पिंजरा प्रदर्शित झाला..!

शापित कला सौंदर्य महजबींन बानो उपाख्य मीना कुमारी ३१ मार्च १९७२ रोजी मरण पावल्या तर मराठी चित्रपट पिंजरा त्याच दिवशी म्हणजेच ३१ मार्च १९७२ रोजी प्रदर्शित झाला. नियतीने दोन दुर्दैवी व्यक्तिमत्वांना असं निरोप अन् स्वागत करून आपल्या समस्त मानव जातीसमोर प्रस्तुत केले होते. फरक फक्त एवढाच होता की, यातील एक वास्तवातील दुर्दैव होते अन् एक आभासी विश्वातील वास्तववादी दुर्दैवी सत्य होते इतकेच..! महजबींन बानो उपाख्य मीना कुमारी अन् पिंजऱ्यातला मास्तर..! असा विलक्षण योगायोग सहसा आढळून आला नाही, हे विशेष..! पिंजऱ्यातला मास्तर अन् मीनाकुमारी एक विलक्षण योगायोग असा कलेच्या विश्वातील दुर्मिळ योगायोग पुन्हा कधी जुळून आलाच नाही.

मीनाकुमारी काय किंवा पिंजऱ्यातला मास्तर काय..दोघेही आपापल्या आयुष्यात प्रेमाच्या चटक्यात होरपळत राहिले. फक्त एकाचे होरपळणे वास्तवातील आयुष्यात होते अन् दुसऱ्याचे आभासी विश्वातील..! मात्र दोघांच्या होरपळण्याला निमित्त होते प्रेमाच्या नशेचा भांग अन् त्यातून निर्माण झालेला प्रेमभंग..! अजुन या दोघात एकासमानता ती अशी की, दोघांनाही समाजाच्या कौतुकाचं ग्लॅमर लाभलं होतं. यातील एकाला वास्तवातील ग्लॅमर लाभले तर दुसऱ्याला आभासी विश्वातील..! माणसाच्या स्वभावाचा सिद्धांत आहे की, ज्याला कुणाला ग्लॅमर मिळते अन् जेंव्हा अशांचे आयुष्य प्रेमामुळे भंग होते, त्याची समाज चर्चा मोठ्या चवीने करतो. असेच काहीसे मीनाकुमारी अन् पिंजऱ्यातल्या मास्तराचे झाले.दोघेही समाजाच्या कौतुकाचे धनी झाले. यातील एकाचे वास्तवातील दुर्दैव ठरले तर दुसऱ्याचे आभासी विश्वातील वास्तववादी दुर्दैवी..! समाजाने मात्र दोघानाही सर्वोत्तम कलाकृती म्हणून डोक्यावर घेतले.

असो, आज महजबींन बानो उपाख्य मीना कुमारी यांचा स्मृतिदिन आहे,त्यानिमित्त त्यांच्या कलासक्त अभिनय कारकिर्दीला अभिवादन..!🙏🏻

अन्...

आज व्हीं. शांताराम दिग्दर्शित पिंजरा या मराठी चित्रपटाला पन्नास वर्षे पूर्ण होत आहेत, त्याबद्दल या परिपूर्ण कलाकृतीला मनापासून दाद..! 👌

वंदे मातरम्..!

एक रसिक - नंदन शोभाबाई विष्णुपंत जाधव.©️

https://jadhavnandan.blogspot.com/?m=1

दिनांक - ३१/३/२०२२, गुरुवार.