' विक्रम '

 

चिंतन ©️

' विक्रम..!'

==============================

ग्रेट विजय सेतुपती, ग्रेट कमल हसन अन् ग्रेट फहाद फासिल..! या तीन दाढ्या,विक्रमी आहेत,आपापल्या अभिनय क्षेत्रात. या तीन दाढ्यांनी असा काही अप्रतिम अभिनय केला आहे की, अभिनयाचा विक्रमच झाला आहे असे वाटू लागते.

नुकताच प्रदर्शित झालेला विक्रम हा मूळचा तमिळ चित्रपट हिंदीत डब केलेला चित्रपट औरंगाबाद येथील चित्रपटगृहात बघितला. आदरणीय कमल हसन सर अन् प्रिय फहाद फासिल यांच्या अभिनयाचा मी निस्सीम चाहता असल्याने कधी विक्रम चित्रपट प्रदर्शित होतो अन् कधी बघतो असे झाले होते.अखेर काही दिवसापूर्वी विक्रम चित्रपट पाहिला अन् कमल हसन सर का खूप ग्रेट आहेत याची पुन्हा एकदा खात्री पटली. आपल्या अभिनयाचे वेगवेगळे प्रयोग आपल्या विविध चित्रपटातून अप्रतिमरित्या सादर करणारे आदरणीय कमल हसन सर हे संपूर्ण भारतीय चित्रपटसृष्टीतील अढळ ध्रुव तारा आहेत यात तिळमात्र शंका नाही.

थोडक्यात चित्रपटाची कथा पुढीलप्रमाणे - विक्रम चित्रपट सुरू होतो तो कमल हसन यांच्या हत्येने.ती हत्या कोण करतं अन् का करतं याचा उलगडा जसजसा चित्रपट पुढे सरकत जातो तसतसा होत जातो. उत्कंठा शिगेला पोहचत फहाद फासिल या तपास अधिकाऱ्याचा प्रवेश होतो.अनेक गुंतागुंत वाढत जाते अन् यात ड्रग माफिया विजय सेतूपती यांचा अतिशय क्रूरपणे प्रवेश होतो. चित्रपटाची कथा यायेक्षा जास्त स्पष्ट करून सांगत नाही,कारण ज्यांनी  अद्याप हा चित्रपट बघितला नाही, त्यांची उत्सुकता संपून जाईल.

विक्रम चित्रपटात कमल हसन सरांनी खूप छान अभिनय केला आहे. कमल हसन सर यांनी या चित्रपटात कमी संवाद व्यक्त केले आहेत,पण आपल्या देहबोलीतून अन् मुद्राभिनयातून सर्वोत्तम अदाकारी सादर केली आहे. कमल हसन सरांना याबद्दल खरचं दाद द्यायला हवी. एका आजोबाचा आपल्या नातवात असलेला जीव कमल हसन सरांनी आपल्या सर्वोत्तम अभिनयातून खूपच छान उभा केला आहे. विशेषकरून आपल्या नातवाला अंगावर झोपविणे, त्याला गरम केलेले दूध पाजणे..! सत्तरीच्या उंबरठ्यावर असलेले आदरणीय कमल हसन सर या चित्रपटात ज्या पद्धतीने स्टंट करतात, ते पाहून हा माणूस अजूनही किती लवचिक आहे याची जाणीव होते.कमल हसन सरांच्या सारखा एवढा मोठा कलाकार या चित्रपटात असूनही हा चित्रपट फक्त त्यांच्यासाठी नाही याची जाणीव होते.

फहाद  फसिल हा नट, स्व.इरफान खान यांच्या सक्षम अभिनयाचा भक्कम वारसदार आहे याची पदोपदी जाणीव होते.शांत ,संयमी भाषेत आपला अभिनय करणे ही स्व.इरफान खान यांची खासियत होती. तीच अभिनयाची नजाकत फहाद  फसिल यांच्या अभिनयात जाणवते. विक्रम चित्रपटात फहाद  फसिल यांनी सस्पेन्स निर्माण करणाऱ्या पोलीस अधिकाऱ्याची भूमिका खूप छान रंगवली आहे.ज्यावेळी फहाद  फसिल यांच्या पत्नीचा खून होतो त्यावेळी त्यांनी केलेला अभिनय खूपच छान आहे..! 

विजय सेतूपती या भक्कम देहाच्या अभिनेत्याच्या अतिशय क्रूरपणे सादर केलेल्या अभिनयाला दाद द्यायला हवी.असा क्रूर खलनायक दक्षिण भारतातील चित्रपटात बऱ्याचदा बघायला मिळतो.तसाच विक्रम  याही चित्रपटात बघायला मिळतो.

विक्रम चित्रपट हा मध्यंतरानंतर खूप वेग पकडतो.एकेक गूढ उलगडत जाते.कमल हसन, फहाद  फसिल  हे खरे कोण आहेत, त्यांचे ध्येय काय असते याचा उलगडा चित्रपटाच्या मध्यंतरानंतर हळूहळू होत जातो. चित्रपटाच्या शेवटी ज्या पद्धतीने  मारधाड दाखवली आहे अन् त्यात ज्या पद्धतीने आदरणीय कमल हसन सर दाखवले आहेत ते एक चित्रपट रसिक म्हणून नक्कीच कमल हसन सरांचे कौतुक करावेसे वाटते.

कमल हसन  सरांच्या सारखे सर्वोत्तम अभिनेत्याचे चित्रपट प्रत्येक रसिक मनाने नक्कीच बघायला हवे,कारण हा माणूस अभिनयाच्या बाबतीत किती मोठ्या उंचीचा आहे हे त्यांच्या प्रत्येक चित्रपटात बघायला मिळते.जसे की ,विक्रम याही चित्रपटात बघायला मिळते.

असो, भारतीय सैन्य , गुप्तहेर हे आपल्या देशासाठी , देशाच्या भल्यासाठी कोणत्याही थराला जाऊ शकतात, यांचं सर्वोत्तम सादरीकरण विक्रम या चित्रपटात सादर केले आहे असे मला वैयक्तिक वाटते.

पुनश्च एकदा आदरणीय कमल हसन सरांच्या अभिनयाला दंडवत..!🙏🏻 

फहाद  फसिल यांच्या अभिनयात लपलेल्या  स्व.इमरान खान यांच्या अभिनयाला मनापासून दाद..!👌🏼

अन् विजय सेतूपती या अभिनेत्याच्या सहज सुंदर अभिनयाला देखील मनापासून दाद..!👌🏼

आणि सर्वोत्तम दाद, दक्षिण भारतातील चित्रपट टीमवर्कला 🙏🏻🌹

वंदे मातरम्

एक रसिक - नंदन शोभाबाई विष्णुपंत जाधव.

https://jadhavnandan.blogspot.com/?m=1

(© सदरील  लेख कॉपीराइट केलेला असून लेखाचे संपूर्ण हक्क लेखकाकडे आहेत.)

दिनांक - ७ जून २०२२, मंगळवार.