मनोहारी मित्र, मनोहर गावडे..!

 

मला प्रवासात भेटलेली माणसं.

" मनोहारी मित्र, मनोहर गावडे..! "

=================================

" तू कितनी भी खुबसुरत क्यु ना हो ए जिंदगी,

खुशमिजाज दोस्तो के बगैर अच्छी नहीं लगती...! "

🙏🌹👬

नात्याच्या बाबतीत सर्व प्राण्यांमध्ये समृध्द प्राणी माणूस..! त्याच माणसाच्या नात्यातील समृध्द नाते दोन...! त्यापैकी एक आईचे अन् दुसरे मित्रांचे..! आता काहींना असे वाटेल की, इतर नाते, समृध्द नात्यात असतात की नाही..? नक्कीच असतील..! पण नात्यातील सूक्ष्म विण ज्या प्रकारे माणूस, आपल्या आईजवळ अन् मित्राच्या जवळ गुंफतो, तितकं इतर नात्याच्या जवळ अणू - रेणू इतका नाही गुंफू शकत, असे मला वैयक्तिक वाटते..!अणू - रेणू इतका फरक असतोच..!

माझा डी. एड चा प्रिय वर्गमित्र मनोहर गावडे ( जि.प.शिक्षक खुलताबाद अन् ह.मु. औरंगाबाद ) अन् मी त्याच मैत्रीच्या नात्यात , त्याच मैत्रीची विण घट्ट बांधून आहोत..! प्रिय मित्र मनोहर, आम्हा सर्व तत्कालीन डी एड बॅच मधील सर्वात प्रेरणादायी मित्र..! आम्ही वैजापूर आणि गंगापूर मधील काही मित्र, कन्नड येथे डी. एड चे शिक्षण घेत असताना, बहुदा त्याकाळी जगातील सर्वात असुविधांनी युक्त असणाऱ्या वसतिगृहात राहत होतो. आमचा हा जिवलग मित्र मनोहर, वेरूळ येथील संत जनार्दन स्वामी मौनगीरी महाराज आश्रमात वास्तव्यास होता. तिथून दररोज कॉलेजला ये जा करायचा..!

आमच्या तत्कालीन डी. एड कालखंडातील आठवणी ,या आजही आमच्या तत्कालीन बॅच मधील आम्हा काही मित्रांना आनंदाने जगायला मदत करतात.प्रिय मित्रा मनोहर , तू आपल्या डी. एड बॅच मधील सर्वात प्रेरणादायी मित्र आहेस..! तुझे आज पर्यंतचे आयुष्य अन् त्यातून तू प्राप्त केलेले आत्मिक समाधान सर्वकाही ग्रेट आहे..! मित्रा मनोहर, तू जेंव्हा शिक्षक म्हणून नोकरीला नव्हतास तेंव्हा रिक्षा चालवून आत्मनिर्भर होत गेलास..!आमच्या तत्कालीन वर्गातील सर्वांचा सर्वोच्च प्रेरणास्थान ,आमचा जिवलग मित्र, मनू ..! कोणतेही पाठबळ नसताना ,एका धार्मिक आश्रमात वास्तव्यास राहून शिक्षण घेऊन स्वतच्या आयुष्यात स्वाभिमानाने उभा राहणे, निव्वळ प्रेरणादायी आहे..! माझे अन् मनोहर मध्ये मैत्रीची विण घट्ट होण्यास मदत झाली ती, संत जनार्दन स्वामी मौनगीरी महाराज ( वेरूळ ) यांच्यावरील आमच्या श्रद्धेमुळे..!🙏

डी. एड ला असताना प्रिय मित्र मनोहर आणि मी ज्या हक्काने आणि आत्मीयतेने आमचा डी. एड चा अतिशय जिवलग मित्र विनय जोशी ( हल्ली कार्यरत, प्रशाला कन्नड ) याच्या घरी जायचो ते नाते आजच्या पिढीत निर्माण होताना दिसत नाही..! विशेष म्हणजे आपला अतिशय प्रिय मित्र विनय वसंतराव जोशी ,कन्नडकर याचा स्वभाव आणि विनयच्या स्वर्गीय आईचा स्वभाव हा ईश्वराने निर्माण केलेल्या प्रेमाच्या नात्यातील सर्वोच्च श्रेणीतील होता, त्यामुळं हे भावूक अन् प्रेमळ नाते वृध्दिंगत होत गेले..! विनयच्या आणि त्याच्या आईच्या, म्हणजेच आपल्या आईच्या प्रेमाची ,मायेची फुंकर आपल्याला ,त्याकाळी नेहमी लाभलेली होती..! आमच्या त्या अतिशय जिवलग मित्रावर, विनय जोशीवर नंतर नक्कीच लिहिल..!

आमच्या तत्कालीन डी एड बॅच मधील सर्व मित्रांमध्ये ,प्रिय मनोहर हा सर्वात समजूतदार मित्र होता..! त्याला हा समजूतदारपणा ,हा परिस्थितीने शिकविला होता..! परिस्थिती आणि परिसर माणसाला सगळं काही शिकवत असते, अगदी तसेच मनोहरच्या बाबतीत झाले. डी एड ला असताना आणि आताही मी, वैयक्तिक माझ्या अंतर्मनातील बऱ्याच विचारांना ,या मित्राजवळ व्यक्त करत असतो, कारण नात्यातील खोली..! आयुष्यात काही अतिशय खाजगीत असलेले प्रिय मित्र असतात, ज्यांच्याजवळ आपण सर्व रंगांची उधळण करत असतो, त्यापैकीच एक प्रिय मित्र मनोहर..! आजही कुठेही प्रवास असेल तर, सहसा मी मनोहरच्या सोबत असतोच..! त्या असलेल्या सोबतीत ,आजच्या आमच्या प्रपंचातील, आयुष्यातील आठवणींवर उकल काढण्याचा प्रयत्न करत असतो.

असो, आम्हा दोघांकडून सर्व भारतीयांना दिवाळीच्या पहिल्या दिवसाच्या म्हणजेच वसुबारस निमित्ताने मनःपूर्वक शुभेच्छा..! 🌹🙏

जय बाबाजी..!

वंदे मातरम्..!

लेखक - नंदन शोभाबाई विष्णुपंत जाधव 

https://jadhavnandan.blogspot.com/?m=1

दिनांक - १२/११/२०२०, गुरुवार, वसुबारस