अजातशत्रू आदरणीय ठोकळ सर..!

 

मला प्रवासात भेटलेली माणसं ©️

अजातशत्रू आदरणीय ठोकळ सर..!

======================

आज दिनांक ७/५/२०२५ बुधवार रोजी ज्येष्ठ निवृत्त शिक्षक आदरणीय शामसुंदर ठोकळ सर रा.लासुरगाव ता. वैजापूर जि. छत्रपती संभाजीनगर यांचा स्वर्गवास झाल्याचे समजले. दुःख वाटले. माझ्या आयुष्याच्या प्रवासात जे ज्येष्ठ सहकारी शिक्षक भेटले त्यातील हळूहळू एक एक तारा निखळत चालला आहे.जसे आज आदरणीय ठोकळ सर यांचं या इहलोकातून कायमचं निघून जाणं..!

आदरणीय ठोकळ सर म्हणजे एक अतिशय जिंदादील व्यक्तिमत्त्व..! अतिशय खडतर परिस्थितीत बालपण, तारुण्य गेलेलं व्यक्तिमत्त्व होते ठोकळ सर..! मी साधारणतः सोळा वर्षे लासुरगाव केंद्रांतर्गत शिक्षक म्हणून सेवा केली. या सेवेत ज्या ज्येष्ठ शिक्षकांचा एक अतिशय अनौपचारिक सहवास लाभला त्यात आदरणीय ठोकळ सर यांचा आवर्जून उल्लेख करावा लागेल. आदरणीय ठोकळ सर अन् मी शिक्षक म्हणून हडस पिंपळगाव ता वैजापूर येथे सोबत कार्यरत होतो. ' मी वयाने ज्येष्ठ शिक्षक आहे ' याचा तसूभर देखील अभिमान आदरणीय ठोकळ सरांनी बाळगला नव्हता. आम्हा तत्कालीन नवतरुण शिक्षक मित्रांमध्ये आदरणीय ठोकळ सर अगदी समरसून जायचे.

आम्ही तत्कालीन शिक्षक मित्र मंडळींनी प्राथमिक शिक्षक संघाच्या त्रैवार्षिक अधिवेशन निमित्त इ.स.१९९५ ते इ.स. २००० दरम्यान जळगाव ( खान्देश ) अन् नागपूर ( विदर्भ ) जो प्रवास केला होता, तो प्रवास अतिशय रम्य अन् हसत खेळत झाला होता. त्या प्रवासात ज्येष्ठ शिक्षक आदरणीय गोमलाडू सर, स्व. टोणपे सर अन् स्व. ठोकळ सर, स्व.सावळे सर, स्व.मेंढे मामा यांनी आपल वय विसरून आम्हा तत्कालीन नवतरुण शिक्षक मित्रांच्या सोबत प्रवासी आनंद साजरा केला होता. त्या आठवणी माझ्या आयुष्याचा अंतिम श्वास असे पर्यंत अन् स्मृती शाबूत असे पर्यंत विसरणे अशक्य आहे.

आदरणीय ठोकळ सर म्हणजे अजातशत्रू व्यक्तिमत्त्व होते.ठोकळ सरांना मी कधीच कुणाचीही वाद करताना बघितले नव्हते. माझ्या साधारणतः सोळा वर्षे लासुरगाव केंद्रांतर्गत शिक्षक म्हणून सेवेत असताना ज्यांच्या शाब्दिक कोट्यांच्या मी निखळ प्रेमात होतो ते पुढील प्रमाणे सर्व आदरणीय व्यक्तिमत्वे होते - स्व. बनकर सर, स्व. ठोकळ सर, स्व. एस.एम.जाधव सर, स्व. जोशी सर अन् सुभानराव आबा देशमुख..! बहुदा हे सर्वजण बालमित्र असावते म्हणून यांच्यातील अनौपचारिक मैत्री यांचे ज्येष्ठ वय झाल्यावर देखील त्यांचं बालवयातील नात्यांत नेहमी एकमेकांना भेटत असायची. विशेषतः सर्वजण आदरणीय एस.एम जाधव सर, जोशी सर अन् सुभानराव आबा देशमुख यांच्यातील निखळ मैत्रीचे बंध असलेल्या शाब्दिक कोट्या ह्या मला आनंदित करून जायच्या. बऱ्याचदा यांच्यात ठोकळ सर देखील सहभागी व्हायचे. बऱ्याचदा ह्या ज्येष्ठ आदरणीय मित्रांच्या शाब्दिक कोट्या ह्या लासुरगाव येथील माझा खूप जिवलग मित्र स्व. मनोहर काळे याच्या हॉटेल मध्ये होत असायाच्या. एकटक बघत अन् ऐकत यांच्यातील निखळ मैत्रीच्या नात्यातील शाब्दिक कोट्या ऐकून भाषिक कौशल्य अन् मैत्रीच्या नात्यातील मर्मबंधातील प्रेमळ ठेव जगायला शिकलो. या ज्येष्ठांच्या शाब्दिक कोट्या बघितल्या की मला माझ्या पालखेड गावातील काही बालमित्रांची आठवण नेहमी यायची. 

माझ्या लासुरगाव केंद्रांतर्गत शिक्षक म्हणून सेवेत ज्या दोन ज्येष्ठ जिवलग मित्रांना खूप जवळून बघता आले ती जिवलग ज्येष्ठ शिक्षक मित्रांची जोडीगोळी होती स्व.टोणपे सर अन् स्व. ठोकळ सर..! नेहमी सोबत असायचे. अगदी शौचाला जाताना देखील मी या दोन ज्येष्ठ मित्रांना बघितलेले आहे.असे अनौपचारिक ज्येष्ठ मित्र आजकाल बहुदा कुठेही सापडणार नाही याची मला खात्री आहे. अशी मैत्री आयुष्याच्या उतरत्या वयात लाभणे याला देखील नशीबच लागते.

असो, लासुरगाव ता. वैजापूर केंद्रांतर्गत माझ्या सेवेतील अनुभवांच्या खूप आठवणी आहेत, त्या यथावकाश कधीतरी माझ्या ब्लॉगवर नक्कीच लिहिल.

आज ज्येष्ठ निवृत्त शिक्षक आदरणीय शाम सुंदर ठोकळ सर रा.लासुरगाव ता. वैजापूर यांचा स्वर्गवास झाला आहे. त्यांच्या आत्म्याला शांती लाभो हीच भारतमातेच्या चरणी प्रार्थना..!

भावपूर्ण श्रद्धांजली..!🙏

वंदे मातरम् 

लेखक - नंदन शोभाबाई विष्णुपंत जाधव.©️

https://jadhavnandan.blogspot.com/?m=1

(© सदरील लेख कॉपीराइट केलेला असून लेखाचे संपूर्ण हक्क लेखकाकडे आहेत.)

दिनांक - ७/५/२०२५, बुधवार