जिवाभावाचा दोस्त - संजू..!

 

आमचे गाव आमची माणसं ©️

जिवाभावाचा दोस्त - संजू..!

==================================

मित्रा संजू उपाख्य डॉ. संजय सखाराम राऊत, आजची परसोडा, ता. वैजापूर येथील रणरणती दुपार तुझ्या सानिध्यात कधी शितलतेचा शिडकावा मनावर उडवून गेली समजलेच नाही. अनेक आठवणी आपल्या भेटीत दाटून आल्या.काही आठवणी आपल्यातील खोडकरपणा जाग्या करून गेल्या.काही आठवणी आपल्यातील बालपणाला पुन्हा एकदा जिवंत करून गेल्या. काही आठवणी आजच्या आपल्या प्रौढ वयाला अजुन टवटवीत करून गेल्या.आपल्या आजच्या भेटीत आलेल्या आठवणी अन् त्या आठवणीतील पात्रांना आपल्या हृदयात, मनात पुन्हा एकदा स्थान देऊन गेल्या..! मित्रा संजू आठवणी ह्या, आपल्या सारख्या भावूक मनांच्या जिवलग मैत्रिणी असतात हेच खरं..! ज्या माणसाच्या आयुष्यात आठवणी अन् त्या आठवणीतील पात्रे नाहीत अशी माणसं मुर्दाड मनाची असतात हे माझं प्रांजळ मत आहे.ज्याला स्मरण आहे तो नात्याचा राजा असतो अन् ज्याला स्मरण नसते अशी माणसं एखाद्या गुलामासारखी असतात. ज्यांना नियतीने स्मरण या अदृश्य भावनाला पारखं केलेलं असतं अशी माणसं याला अपवाद असतात हेही तितकेच खरे..!

जिवाभावाच्या दोस्ता संजू तू , गणेश वाणी, आण्णासाहेब म्हस्के अन् विजू गायकवाड ही जिवलग मित्र माझ्या आयुष्यातील बालपण, पौगंडावस्था,तारुण्य अन् आता प्रौढपण या चारही टप्प्यांवरील खूप गलबते आहात. इतरही अनेकजण आहेत, पण तुम्ही माझं आयुष्य जवळून बघितलं आहे. तुम्ही अशी गलबते आहात, ज्याच्याकडे बघुन माझ्या आयुष्याचे जहाज योग्य दिशेने प्रवास करत गेले,आहे अन् राहील. कोणत्याही जहाजाला गलबतांशिवाय काहीही महत्त्व नसते.जहाज हे गलबतांकडे बघून आपल्या आयुष्याचा प्रवास करत असते.त्या प्रवासात भले सागराची आवश्यकता असेल, पण हाच आयुष्यरूपी सागर जेंव्हा उधानावर असतो ,तेंव्हा जहाज आपल्या ध्येयाकडे, आपल्या गलबतांकडे बघून आपलं मार्गक्रमण करत असते.जसे मी माझ्या आयुष्यात तुम्हा जिवलग मित्रांकडे बघून मार्गक्रमण करत आलेलो आहे अन् राहील..!

आपला खूप जिवलग बालमित्र स्व.शाम शेळके आजही आपल्या बैठकीत उपस्थित होता. त्याचं आपल्या मित्रांच्या बैठकीत उपस्थित राहणं कधीही गैरहजेरीत नसतं. ज्यादिवशी स्व.शाम शेळके आपल्या गप्पांच्या मैफिलीत गैरहजर असेल तो दिवस मैत्रीच्या देवतेला कधीही आवडणार नाही.

जिवलग मित्रा संजू, आज तू तुझ्या वैद्यकीय क्षेत्रात खूप समाधानी आहेस, त्याच कारण तुझे सत्कर्म..! तू आज पर्यंत, कोणताही छुपा अजेंडा मनी न धरता नेहमी सत्कर्म करत आला आहेस. त्याचं फळ तुझ्या आजच्या समाधानी आयुष्याला आहेस. एक जिवाभावाचा मित्र म्हणून तू आम्हा काही मित्रांच्या आयुष्यात किती मोठा आहेस याची मला जाणीव आहे.तू एक जिवलग मित्र म्हणून ज्या जबाबदारीने माझ्या लग्नात खूप महत्त्वाची भूमिका पार पाडली होती त्या नात्याला माझ्या कुटुंबाकडून सदैव दंडवत असेल..! 

मित्रा संजू , तू जेंव्हा डॉक्टर झालेला नव्हतास, तेंव्हा तु स्वतः ला आयुष्यात उभे करण्यात ज्या कष्टांना सोबत घेतले होतेस, याचा साक्षीदार एकमेव व्यक्ती आहे अन् ती म्हणजे आपला खूप जिवलग बालमित्र डॉ.गणेश वाणी..! कदाचित म्हणून तुम्हा दोघांची मैत्री ही सदैव भूतकाळाच्या जाणीवा जागृत ठेवून आजही जिवंत आहे. नव्वदच्या दशकात तू अन् गणेश वाणी तत्कालीन औरंगाबाद शहरातील नूतन कॉलनी परिसरात एकत्र राहिलात त्या तुझ्या अतिशय खडतर दिवसांनी साष्टांग दंडवत..! त्या काळात अन् त्याच परिसरातील तुमच्या खोलीत मी अन् आपला खूप जिवलग बालमित्र स्व.शाम शेळके एका रात्री मुक्कामी आलो होतो, तो प्रसंग आजही आठवला की खूप हसू येते. त्या आठवणींवर कधीतरी नक्कीच लिहिणार आहे. शेवटी आठवणी ह्या आपल्या जिवलग मैत्रिणी असतात हेच खरं..!

कोसळणारा मुसळधार पाऊस, बोर नदीला आलेला पुर, ऐन रात्रीच्या वेळी  झालेला माझा प्रवास आयुष्यातील एक कायमची आठवण देऊन गेलेला आहे. याचा साक्षीदार तू आहेस मित्रा..! त्यावर लिहिल कधीतरी..! जेवढं आपल्याकडून शक्य आहे तेवढं चांगलं द्यावं या विचारावर अढळ श्रद्धा बाळगून असणारे आपण..! 

बाकी मित्रा, आज मनसोक्त कौटुंबिक गप्पा झाल्या. मी चहा पीत नाही हे तुला माहीत आहे, म्हणून अनेकदा थंडगार सरबताची सरबत्ती झाली. कित्येक तासांच्या बैठकीत आपल्या गप्पांच्या मैफिलीत आपलं कुटुंब सहभागी झाले होते याचा विशेष आनंद झाला.मात्र आपलं दोघांचं कुटुंब आजच्या आपल्या गप्पांच्या बैठकीत एका रसिक श्रोत्याच्या भूमिकेत होते हे मात्र खरं..! त्यांना देखील आपल्या आयुष्यातील अनेकानेक आठवणींच्या हिंदोळ्यावर बसायला आवडले. मित्रा संजू, आपल्या आयुष्यातील अनेकानेक आठवणींच्या हिंदोळ्यावर बसायला कुणाला आवडणार नाही..? सर्वानाच आवडेल..! त्याचं कारण, आपलं आयुष्य हे मैत्रीच्या नंदनवनातील सुमधुर फुलांच्या सुगंधासारखे आहे.असा सुगंध, ज्याचा सुगंधी दरवळ सर्वदूर पसरलेला जाणवतो.अगदी केदारनाथ बाबाच्या सानिध्यापर्यंत..!🕉️

वंदे मातरम्..!

लेखक : नंदन शोभाबाई विष्णुपंत जाधव.©️

https://jadhavnandan.blogspot.com/?m=1

(© सदरील लेख कॉपीराइट केलेला असून लेखाचे संपूर्ण हक्क लेखकाकडे आहेत.)

दिनांक - १२ जून २०२३, सोमवार