" आमचे गाव ,आमची माणसं ""
दिलू, आमचा सचिन तेंडुलकर..!
___________________________________________
क्रिकेट...हा सर्व भारतीयांचा आवडता खेळ..!त्यात आमच्या पालखेड , ता.वैजापूर गावात या खेळाविषयी अबाल,वृद्घांना खूप गोडी..!या फोटोत जी व्यक्ती मधोमध उभी आहे,तो आमचा बालमित्र-दिलीप सूराशे..! मी त्याला नेहमी " दिलू " या नावानेच हाक मारतो..!
आमच्या तत्कालीन (१९९५ ते २०००) शिवशक्ती क्रिकेट संघातील खूप महत्त्वाचा फलंदाज होता.आम्ही आमचा संघ खेळण्यास पालखेड परिसरात असलेल्या शिवराई,जळगाव, चोर वाघलगाव, परसोडा,विनायक नगर,लासूरगाव,दहेगाव(शेड), काटे पिंपळगाव इ.ठिकाणी घेऊन जायचो.तिथले संघही आमच्या गावात खेळायला यायचे..!दिलीपच्या फलंदाजीत एक नजाकत होती..!समोर कितीही घातक गोलंदाज असो,हा दिलू, चेंडूला अगदी लीलया पार करायचा..!याला बाद करणे,गोलंदाजांना खूप कठीण जात असे.दिलीपचा स्टेट ड्राईव्ह अतिशय तंत्रशुद्ध असायचा..!दिलीप टेनिस बॉल,लेदर बॉल वर खूप नेत्रदीपक फलंदाजी करत असे..!
प्रिय बालमित्र दिलीप उपाख्य दिलू , आमच्या गावातील तसेच पंचक्रोशीतील सर्वोत्कृष्ट फलंदाज होता..! आमच्या पालखेड गावातील ही साधी सरळ अन् गोड स्वभावाची माणसं आहेत, ज्यांना भेटलं की मैत्रीच्या नात्याला अजुन उभारी येते. दिलीप सारखी माणसं, अजातशत्रू असणाऱ्या माणसांचं प्रतिनिधित्त्व करणारी असतात.माझ्या तरी पाहण्यात आलेले आहे की, प्रिय बालमित्र दिलीप उर्फ दिलू हा कधीही कुणाच्याही वाह्यात फंद्यात पडलेला नाही..! कधीही भेटला तर अगदी सौम्य स्वरूपात हसून अन् प्रेमळ भाषेतच बोलणार ,असा आमच्या दिलुचा स्वभाव आहे..!
आमच्या पालखेड गावातील आमच्या समकालीन मित्रांमध्ये ज्या दोन ग्रेट फलंदाजांच्या तंत्रशुद्ध फलंदाजीचा मी निःसीम चाहता होतो ते दोघे आहेत, प्रिय बालमित्र दिलू सुराशे अन् माझा वर्गमित्र अन् बालमित्र शेख फैय्याज बागवान..! ( ह.मु. औरंगाबाद ) . शेख फैय्याज बागवान आणि दिलीप सूराशे यांचे क्रिकेट संघ पालखेड येथे नव्वदच्या दशकात जेंव्हा समोरासमोर खेळायला उतरायचे तेंव्हा या दोन्ही प्रिय बालमित्रांकडून अप्रतिम अशा फलंदाजीचे सादरीकरण व्हायचे..! त्यात आमचं पालखेड गाव कलेच्या अन् खेळाच्या बाबतीत जरा जास्तच आघाडीवर..! आमच्या गावातील क्रिकेट शौकीनांचे भरभरून प्रेम शेख फैय्याज बागवान अन् दिलीप सुराशे लाभले आहे..!
प्रिय बालमित्र दिलू आणि शेख फैय्याज बागवान या ग्रेट मोजक्या व्यक्तीमुळे आमच्या पालखेड गावातील क्रिकेट खेळाला अन् त्यातील फलंदाजीला तंत्रशुद्ध फलंदाज म्हणून नजाकत लाभलेली आहे..!
दिलीपला खेळण्यासाठी योग्य मार्गदर्शन व पुढील ठिकाणे मिळाली असती तर हा दिलीप नक्कीच खूप चमकला असता हा आम्हाला खूप विश्वास होता..!पण त्याकाळी ग्रामीण भागात अश्या तांत्रिक बाबींवर कुणी विचार केला नाही तसेच मुख्य म्हणजे परिस्थितीही आड आली..!
माझ्या गावातील या सचिन तेंडुलकर ला त्याच्या क्रिकेट खेळातील कलात्मकतेकरिता माझा व खालील छायाचित्रातील कडेचा प्रिय बालमित्र डॉ.संजय राऊतचा मानाचा मुजरा..!
ता.क. : दिलीपला आम्ही कधीच रागावलेले पाहिलेले नाही..!🙏
वंदे मातरम्..!
लेखक - नंदन शोभाबाई विष्णुपंत जाधव पालखेडवाले.
https://jadhavnandan.blogspot.com/?m=1
दिनांक :३० नोव्हेंबर २०१७
कोणत्याही टिप्पण्या नाहीत:
टिप्पणी पोस्ट करा