आमचे गाव आमची माणसं ©️
कसोटी क्रिकेटचे यश - स्लीप झेल अन् चिवट फलंदाजी..!
=====================
साधारणतः चाळीस वर्षांपूर्वी आम्ही बालवयात होतो तेंव्हा पालखेड पासून साधारणतः पंधरा किलोमीटर अंतरावरील महालगाव येथून मोठ्या पुरुषांचा क्रिकेट संघ पालखेड येथे कसोटी क्रिकेट सामना खेळायला यायचा. क्रिकेट सामना कॉर्क ( अत्यंत टणक असलेला चेंडू ) चेंडूवर खेळला जायचा. महालगाव क्रिकेट संघाचे नेतृत्व Dr. थावरे तर पालखेड येथील क्रिकेट संघाचे नेतृत्व आदरणीय स्व.रामकृष्ण पाटील रोठे करायचे.
ज्यावेळी पालखेडच्या संघाचे क्षेत्ररक्षण असायचे त्यावेळी सामन्यात स्लीप मध्ये आदरणीय Dr. दिलीप शेळके यांचं स्थान पक्के असायचे. Dr. दिलीप शेळके म्हणजे अत्यंत चपळ क्षेत्ररक्षक होते. Dr. दिलीप शेळके यांनी त्यांच्या क्रिकेट कारकीर्दीत एकदाही झेल सोडला नव्हता. पालखेडच्या तत्कालीन क्रिकेट कसोटी सामने जिंकण्यात Dr. दिलीप शेळके यांचं अमूल्य असे योगदान असायचे.कसोटी सामन्यात क्षेत्ररक्षण करताना स्लीपची जागा अत्यंत महत्त्वाची असते.
Salute आदरणीय Dr. दिलीप भाऊ शेळके..!🙏🏏
सध्या भारत विरुद्ध इंग्लंड कसोटी सामना मालिका सुरू आहे. या मालिकेतील पहिला सामना लीड्स - ( इंग्लंड ) येथील कसोटी सामन्यात भारताच्या यशस्वी जैस्वालने स्लीप मध्ये क्षेत्ररक्षण करताना सहज घेता येणारे तब्बल तीन झेल सोडून दिले. कसोटी क्रिकेट मध्ये एक एक क्षण अत्यंत महत्त्वाचा असतो.म्हणून त्याला कसोटी म्हणतात. लीड्स कसोटी सामना आपण हारलो. तो सामना आपण पराभूत होण्यात यशस्वी जयस्वालचा मोठा हातभार लागला होता.
कसोटी क्रिकेट सामन्यात अत्यंत चिवटपणे फलंदाजी करावी लागते.संयम, सातत्य अन् एकाग्रता यांचं मानसिक मिश्रण फलंदाज अन् गोलंदाजांना कसोटी सामन्यात कृतीतून दाखवून द्यावे लागते.विशेषत: फलंदाजांना..!
महालगाव क्रिकेट संघाविरुद्धच्या कसोटी क्रिकेट सामन्यात पालखेड क्रिकेट संघाचे प्रारंभीचे फलंदाज ( ओपनर ) असायचे आदरणीय सदाशिव आण्णा जगताप अन् दुसरे असायचे आदरणीय स्व. गजानन निकम उर्फ गजा भाऊ निकम..! सदाशिव आण्णा जगताप अन् गजा भाऊ निकम अत्यंत चिवटपणे फलंदाजी करत असायचे. विशेषतः गजा भाऊ निकम..! सकाळी फलंदाजीला आलेला गजा भाऊ निकम दिवसाखेर नाबाद असायचा.धावा हळूहळू काढायचा, पण एकदा का फलंदाजीचा खुट्टा गाडला की, महालगावच्या गोलंदाजांना गजा भाऊ निकम यांना बाद करणे अत्यंत कठीण जायचे. अजून एक विशेष म्हणजे स्व.गजा भाऊ निकम, महालगावच्या वेगवान गोलंदाजांच्या बहुतांशी चेंडूला अगदी जागच्या जागीच सुरक्षात्मक पद्धतीने खेळायचा. यामुळं महालगावचे गोलंदाज, क्षेत्ररक्षक अन् Dr. थावरे वैतागून जायचे. विशेष म्हणजे विना हेल्मेट क्रिकेट खेळल्या जायचे..!
सध्या भारत विरुद्ध इंग्लंड कसोटी सामना मालिका सुरू आहे. या मालिकेतील तिसरा कसोटी सामना काल दिनांक १४ जुलै २०२५ रोजी लॉर्डस ( लंडन ) येथे काल संपन्न झाला.त्यात आपण फक्त २२ धावांनी पराभूत झालो. या सामन्यात रवींद्र जडेजाने एका बाजूने अत्यंत चिवटपणे फलंदाजी केली,मात्र त्याला इतर कोणत्याही भारतीय फलंदाजांनी अजिबात साथ दिली नाही.थोडीफार साथ दिली ती गोलंदाजांनी..! जसप्रीत बुमराह अन् मोहम्मद सिराज यांनी काहीवेळ टिकून राहण्याची अत्यंत कौतुकास्पद भूमिका निभावली. मात्र ज्यांच्यावर खरी जबाबदारी होती ते भारतीय फलंदाज पटपट बाद होत गेले अन् फक्त १९३ धावांचे ध्येय आपण गाठू शकलो नाही.
Salute आदरणीय स्व. गजानन भाऊ निकम उपाख्य गजा भाऊ..!🙏🏏
खेळ आहे, त्यात हार - जीत असतेच.मात्र हार तेंव्हा जिव्हारी लागते जेंव्हा क्षमता असून अन् हातातोंडाशी जिंकत आलेला सामना जिंकला जात नाही.
असो, सध्याची भारत विरुद्ध इंग्लंड ' तेंडुलकर - ॲंडरसन कसोटी क्रिकेट मालिका ' क्रिकेटच्या इतिहासात नक्कीच मानाचे स्थान प्राप्त करील यात तिळमात्र शंका नाही..!🏏
आठवणी आपल्या जिवलग मैत्रीणी असतात.फक्त त्यांच्यावर निस्सीम प्रेम करता आलं पाहिजे..! कसोटी क्रिकेटचे यश - स्लीप झेल अन् चिवट फलंदाजी याविषयीची प्रासंगिक आठवण आली , म्हणून व्यक्त झालो बाकी काहीही नाही.
वंदे मातरम् 🏏
कसोटी क्रिकेटचा निस्सीम चाहता - नंदन शोभाबाई विष्णुपंत जाधव.©️
https://jadhavnandan.blogspot.com/?m=1
(©
सदरील लेख कॉपीराइट केलेला असून लेखाचे संपूर्ण हक्क लेखकाकडे आहेत.)
दिनांक - १५/७/२०२५, मंगळवार ( शुभ सकाळ)
