भेट..!

 

मला प्रवासात भेटलेली माणसं ©️

भेट..!

===================================

डॉ.जीवन राजपूत..!

जन्मगाव पालखेडच्या शिवावरचा माणूस..!

म्हणजेच बेंदवाडी, ता. वैजापूर येथील मूळचा नागरिक..!

माझ्या जन्मगावी पालखेड येथे प्राथमिक शिक्षणाच्या आयुष्याचा काही काळ व्यतीत केलेला माणूस..!

कितीही व्यस्त कार्यक्रम , रुग्णसेवा असो, दरवर्षी आमच्या पालखेड गावातील ग्राम दैवत श्री.पारेश्वर महादेवाच्या यात्रेला दर्शनासाठी आवर्जून येणारा भाविक माणूस..!

आणि सर्वात महत्त्वाचं म्हणजे माझे परम आदरणीय गुरू श्री.गोमलाडू ( राजपूत ) सरांचे चिरंजीव असलेले व्यक्तिमत्त्व श्री.डॉ जीवन राजपूत (न्यूरोसर्जन)..!

डॉ. जीवन राजपूत यांनी त्यांचं नवीन अद्ययावत इमारतीत इस्पितळ जे. जे. प्लस हॉस्पिटल & NEURON international चा शुभारंभ काल दिनांक १७/९/२०२३ रोजी केला. काल मराठवाडा स्वातंत्र्य दिन असल्यामूळे शुभेच्छा देण्यासाठी जाणे शक्य झाले नाही. मात्र आज आवर्जून सपत्नीक गेलो.

सदरील अद्ययावत इस्पितळात गेल्यावर एक विचार मनात येत होता. परम आदरणीय गुरू श्री.गोमलाडू ( राजपूत ) सर यांची भेट व्हायला हवी होती. पण सर घरीच असतील. सरांची खूप दिवस झाले भेट नाही.मागे एकदा इ. स.२०१७ मध्ये भेट झाली होती.त्यावर मी माझ्या ब्लॉगवर लिहिलं आहे.

अचानक आदरणीय गोमलाडू सर मला लिफ्ट मधून येताना दिसले.धावत सरांकडे गेलो.आदरणीय गोमलाडू सरांच्या पायी मस्तक टेकवलं..! कोण आहे म्हणून सरांनी बघितले, माझ्या खांद्याला धरून मला उभे केले.माझ्या दोन्ही गालांना धरून सरांच्या मुखातून शब्द बाहेर पडले..

" अरे नंदू, खूप दिवसांनी भेटला रे..! कुणी पेशंट ॲडमीट आहे का..? ये इकडे ये..बाजूला..!

मी म्हणालो - " सर, काल जीवन भाऊंनी नवीन इमारतीत अद्ययावत हॉस्पिटल सुरू केले.मला कालच शुभेच्छा द्यायला यायचे होते,पण काल १७ सप्टेंबर निमित्त ध्वजारोहण असल्यामूळे येऊ शकलो नाही.म्हणून आज आलो आहे..!"

आदरणीय गोमलाडू सर माझ्या स्व.तीर्थरूप वडिलांचे मित्र होते.विशेष म्हणजे माझे वडील अन् गोमलाडू सर दोघेही कमालीचे स्वयंशिस्तीचे..! मोडेन पण वाकणार नाही या विचारसरणीचे..! आदरणीय गोमलाडू सर वयोमानानुसार आता काहीसे थकले आहेत. गप्पा झाल्यावर डॉ. जीवन राजपूत यांच्या कक्षात गेलो. गावाकडचा माणूस भेटला की , कोणताही माणूस गावाकडच्या अनौपचारिक भाषेत बोलतो.तो प्रत्यत आमच्या भेटीत एकमेकांना आला. 

गप्पा आटोपल्यावर डॉ. जीवन राजपूत यांना नवीन इमारतीत अद्ययावत इस्पितळ जे. जे. प्लस हॉस्पिटल & NEURON international सुरु केल्याबद्दल अभिनंदन अन् पुढील कार्यास शुभेच्छा दिल्या..!🌹

डॉ. जीवन राजपूत यांना एक छानसा पेन सप्रेम भेट म्हणून दिला. भेट म्हणून दिलेला पेन बघून डॉ. जीवन राजपूत यांना अतिशय आनंद झाला.त्यावर म्हणाले...

" सर, खूप छान वस्तू भेट दिली. आता लगेच त्याचा उपयोग पेशंटला औषधी लिहून देण्यासाठी सुरू करतो आणि जवळच ठेवतो..!"

गप्पा झाल्यावर मी प्रेमाने " वंदे मातरम्..!" म्हणून निरोप घेतला.प्रत्युत्तर दाखल डॉ.जीवन राजपूत यांनी देखील " वंदे मातरम् सर..!" म्हणून निरोप दिला..! 

सदरील अद्ययावत इस्पितळ पत्ता - जे.जे. हॉस्पिटल जिल्हा न्यायालयासमोर जालना रोड बाबा पेट्रोल, छत्रपती संभाजीनगर ( महाराष्ट्र)

वंदे मातरम्

नंदन शोभाबाई विष्णुपंत जाधव.©️

https://jadhavnandan.blogspot.com/?m=1

(© सदरील लेख कॉपीराइट केलेला असून लेखाचे संपूर्ण हक्क लेखकाकडे आहेत.)

दिनांक - १८/९/२०२३,सोमवार.