" राॅकेट्री : द नंबी इफेक्ट "

 

चिंतन ©️

" राॅकेट्री : द नंबी इफेक्ट "

=============================

भारतीय माणसाने, भारतीय माणसासाठी , भारताच्या महान शास्त्रज्ञाला आपल्या कलात्मक अन् सर्वोत्तम अभिनयाच्या द्वारे वाहिलेली सर्वोत्तम कलाकृती म्हणजे राॅकेट्री : द नंबी इफेक्ट होय..!

आर. माधवन दिग्दर्शित अन् अभिनित राॅकेट्री : द नंबी इफेक्ट हा चित्रपट महान भारतीय अंतरीक्ष शास्त्रज्ञ नंबी नारायणन यांच्या कार्यावर आधारित आहे. अंतरीक्ष क्षेत्र, रॉकेट तंत्रज्ञान अन् त्यातील अभ्यासपूर्ण घटक याविषयी मला फारसे ज्ञान नाही, पण हे सर्व घटक ज्या पद्धतीने या चित्रपटात आर.माधवन यांनी सादर केले आहेत, त्यासाठी त्यांना ग्रेट सॅल्युट..!🙏🏻  

एवढे महान अन् विद्वत्तेचे धनी असलेले थोर शास्त्रज्ञ नंबी नारायणन यांनी आपल्या आयुष्यात कुणीतरी आरोप केले अन् त्यामुळे केवळ संशयाच्या भोवऱ्यात ज्या मरण यातना भोगल्या त्या बघून अंगावर काटे उभे राहतात.प्रचंड मानसिक अन् शारीरिक त्रास होऊनही नंबी नारायणन ज्या पद्धतीने स्वतः ला आयुष्यात सिध्द करतात ते बघून त्यांच्या समोर नतमस्तक झाल्या शिवाय राहवलं जात नाही. पण असे होताना भारताचा एक नागरिक म्हणून माझी मलाच लाज वाटते . कारण एवढ्या खूप मोठ्या उंचीच्या भारतीयाला आपण काय दिले तर.. त्यांच्या कुटुंबीयांला, त्यांना स्वतःला होणारा त्रास..!😔 नशीब, इ. स.२०१९ मध्ये भारत सरकारने थोर शास्त्रज्ञ नंबी नारायणन यांचा योग्य तो सन्मान राखत त्यांना पद्म विभूषण पुरस्कार देऊन गौरविण्यात आले.

चित्रपटाची सुरुवात ज्या पद्धतीने होते, विशेषतः बॅक ग्राउंड वर सुरू असलेल्या मंत्रोच्चारात होते, ते ऐकून तो प्रसंग दक्षिण भारतातील आहे याची जाणीव होते.या चित्रपटात आर.माधवन ,नंबी नारायणन यांचं अख्खं आयुष्य अक्षरशः जगले आहेत.आर.माधवन यांनी त्यांच्या आज पर्यंतच्या आयुष्यातील सर्वोत्तम भूमिका सादर केली आहे यात तिळमात्र शंका नाही.

भारताला रॉकेट तंत्रज्ञान प्राप्त करण्यासाठी नंबी नारायणन यांनी फ्रान्स मध्ये ज्या पद्धतीने आपली अस्सल विद्वत्ता ,समयसूचकता, जिद्द, चिकाटी उपयोगात आणली, ज्ञान प्राप्त करण्यासाठी आपल्या गुरूंच्या घरी वाटेल ती घरगुती कामे केली, ते बघून क्षणक्षणाला या थोर व्यक्तिमत्वासमोर आपले शरीर अन् मन पुन्हा पुन्हा नतमस्तक होते.

या चित्रपटात आर.माधवन यांनी माझ्या मते तीन प्रसंगात आपल्यातील सर्वोत्तम अभिनयाला सादर केले आहे. ते प्रसंग पुढील प्रमाणे..

(१) थोर शास्त्रज्ञ नंबी नारायणन यांना तुरुंगात थर्ड डिग्री शिक्षा दिली जाते.काही दिवसांनी त्यांचा एक माजी सहकारी संशोधक मित्र त्यांना भेटायला पोलीस स्टेशन मध्ये येतो.त्यावेळी आर.माधवन यांनी जो अभिनय सादर केला आहे तो निव्वळ लाजवाब आहे.

(२) देशद्रोही म्हणून समाज थोर शास्त्रज्ञ नंबी नारायणन यांना अन् त्यांच्या कुटुंबाला वाळीत टाकतो. नंबी नारायणन यांचं वय वाढत जाते.तब्येत देखील काहीशी स्थूल होत जाते. विशेष म्हणजे आर.माधवन यांनी खरोखर आपली तब्येत वाढवलेली आहे.त्यांची पत्नी आजारी पडते.आपल्या पत्नीला दवाखान्यात न्यायचे असते.बाहेर पाऊस सुरू असतो. एका रिक्षाला हात देऊन थांबवतात.रिक्षा थाबते, त्यात दोघे पती पत्नी बसतात,पण काही अंतर रिक्षा गेल्यावर दोघाही पती पत्नीला रिक्षातून ढकलून दिल्या जाते.त्यावेळी भर पावसात, आर.माधवन यांनी इतर वाहनांना थांबविण्यासाठी जो अभिनय केला आहे तो बघून मशाल अन् घायल चित्रपटातील अनुक्रमे दिलीपकुमार अन् सनी देओल यांच्या सर्वोत्तम अभिनयाची नक्कीच आठवण येते..! 

(३) नंबी नारायणन अन् त्यांची पत्नी एका लग्न समारंभात गेलेले असतात.तिथं ज्यावेळी वयस्कर होत चाललेल्या नंबी नारायणन यांना ते निर्दोष असल्याचा सर्वोच्च न्यायालयाने निकाल दिला आहे असा फोन येतो. त्यानंतर आर.माधवन यांनी आपल्या पत्नीला मायेच्या कुशीत घेऊन जो अभिनय केला आहे, तो बघून तर असे वाटते की, आर.माधवन किती मोठ्या उंचीचा अभिनेता आहे म्हणून..!

फक्त संशयाच्या आधारावर एका खूप महान भारतीय अंतरीक्ष शास्त्रज्ञाला किती मरण यातना सोसाव्या लागल्या ते बघून आपले शरीर थिजून जाते.

मी अगोदरच उल्लेख केला आहे की, अंतरीक्ष क्षेत्र, रॉकेट तंत्रज्ञान अन् त्यातील अभ्यासपूर्ण घटक याविषयी मला फारसे ज्ञान नाही. पण रॉकेट तंत्रज्ञान, विकास इंजिन नसते तर आपण मंगळ ग्रहावर जगातील सर्वात स्वतः खर्चात पोहोचू शकलो असतो का..?

आपल्या देशाची आर्थिक स्थिती भक्कम नसताना ,आपल्या देशात जे आज अंतरीक्ष तंत्रज्ञान विकसित झाले आहे ते विकसित झाले असते का..?

इत्यादी अनेक बाबींमध्ये आज आपला भारत देश महासत्ता होण्याच्या मार्गावर आहे,त्याचे खूप मोठे श्रेय जाते ते थोर अंतरीक्ष शास्त्रज्ञ नंबी नारायणन यांनाच..!

चित्रपटाच्या शेवटी भारताचे पंतप्रधान वंदनीय नरेंद्र मोदी यांचे शास्त्रज्ञ अन् त्यांच्या कार्याविषयी जे मनोगत बॅक ग्राउंड वर सुरू असते त्यावेळी आपला भारत आता जगाच्या पटलावर मोठी सत्ता होण्याच्या मार्गावर पुढे पुढे जात आहे याची जाणीव होते..!

वंदे मातरम्..!🙏🏻🇮🇳🙏🏻

एक रसिक - नंदन शोभाबाई विष्णुपंत जाधव.©️

https://jadhavnandan.blogspot.com/?m=1

(© सदरील लेख कॉपीराइट केलेला असून लेखाचे संपूर्ण हक्क लेखकाकडे आहेत.)

दिनांक - ३ जुलै २०२२, रविवार.