चिंतन ©️
बाई पण भारी देवा..!
====================================
बाई पण भारी देवा हा मराठी चित्रपट माझ्या मते मध्यमवर्गीय महिलांच्या मनातल्या कोंडलेल्या भावनांना मोकळी वाट करून देणारा चित्रपट आहे.माऊथ पब्लिसिटी मुळे एखादा चित्रपट किती प्रसिद्ध होऊ शकतो याचं उदाहरण द्यायचे झाल्यास बाई पण भारी देवा हा चित्रपट योग्य उदाहरण आहे.
स्री चे मन मुळात भाऊक असते.त्या मनाला जर कुणी दुखावलं तर ती स्री आतून स्वतः चा किती कोंडमारा करून घेते याचं उदाहरण म्हणजे बाई पण भारी देवा..!
एखाद्या कमावत्या स्री चा नवरा , आपल्या पत्नीचा आर्थिक फायद्यासाठी कसा बेमालूमपणे वापर करून घेतो याचं उदाहरण म्हणजे बाई पण भारी देवा..!
सारख्या वयोगटातील महिला समज गैरसमज मधून आपला तकलादू अहंकार आयुष्यभर कसा जपत राहतात अन् शेवटी अश्रूंना वाट मोकळी करून एकीच्या कुशीत हाय मोकळून रडून दुःख्खाला वाट मोकळी करून देतात याचं उदाहरण म्हणजे बाई पण भारी देवा..!
आपल्या अंगावरील दागिन्यांचा अहंकार , आपल्या भौतिक साधन संपत्तीचा फुगवटा समाजात मिरविणाऱ्या स्री च्या भावना व्यक्त करणारा चित्रपट म्हणजे बाई पण भारी देवा..!
एका अती शिस्तप्रिय पुरुषाच्या धाकात राहून आपल्या परिवारासाठी सोशिक आयुष्य जगणाऱ्या स्री च्या भावनांचा चित्रपट म्हणजे बाई पण भारी देवा..!
आपला पती बाहेरख्याली आहे हे माहीत असूनही त्याच्यावर निस्सीम प्रेम करणाऱ्या स्री च्या भावनांचा चित्रपट म्हणजे बाई पण भारी देवा..!
स्वतः ची शक्ती माहीत झाल्यावर आपल्या बाहेरख्याली पतीला आपल्या आयुष्यातून फेकून देऊन स्वतः ताठ मानेने उभे राहणाऱ्या स्री च्या आयुष्याची कथा म्हणजे बाई पण भारी देवा..!
आणि मला, बाई पण भारी देवा या चित्रपटातील सर्वात आवडलेला अभिनय अन् त्याच सादरीकरण तेच , ज्यावेळी एका स्री ची घुसमट ती आपल्या संवादातून व्यक्त करते. निमित्त असते आपल्या लेकरांचा जन्मदिन अन् त्यावेळी त्या स्री ने आपल्या भावनांना मोकळी करून दिलेली वाट..! एक कमावती स्री आपल्या कुटुंबासाठी, विशेषतः आपल्या नवऱ्याचे मन सांभाळता सांभाळता स्वतः किती खचून जाते याचं सर्वोत्तम अभिनय सादरीकरण होय. आपल्या कमावत्या पत्नीच्या जीवावर टिमक्या मारणाऱ्या अन् आपल्या पतीसाठी मनाचा होणारा कोंडमारा ज्या सर्वोत्तम अभिनयातून त्या स्री ने सादर केला आहे त्यासाठी हॅटस ऑफ..!
विशेषतः ती स्री आपल्या लेकरांच्या वाढदिवसाच्या कार्यक्रमातून निघून एका कार मध्ये जाऊन बसते अन् खुप मोठ्याने रडत आपल्या कित्येक दिवसापासून दबलेल्या भावनांना वाट मोकळी करून देते.
ते दृश्य बघत असताना डोळ्यात अश्रू येतात. ते दृश्य बघून एक स्री आपलं मन दुसऱ्याचे मन राखता राखता स्वतः चे मन किती मारून टाकते याची जाणीव झाली. हे फक्त चित्रपटातील दृश्य नसून ती संवेदना बहुतांशी महिलांची व्यक्त होते. फक्त प्रतिनिधित्व करणारी ती मोठ मोठ्याने रडणारी स्री ठरते इतकेच..!
रसिक प्रेक्षकांना, महिलांच्या व्यथा अन् कथा जर आपल्यातील जाणवल्या तर माहेरची साडी या चित्रपटाने जे गारूड रसिकांच्या मनावर गाजवले होते, त्याचीच पुनरावृत्ती बाई पण भारी देवा या चित्रपटाने केली आहे असे मला वाटते.
आम्ही उभयतांनी बाई पण भारी देवा हा चित्रपट सोबत बघितला. मात्र चित्रपटगृहात पुरुष अगदी बोटाच्या कांड्यावर मोजता येतील इतकेच आढळून आले. वास्तविक माझ्या मते प्रत्येक नवऱ्याने आपल्या पत्नीच्या सोबत बाई पण भारी देवा हा चित्रपट नक्कीच बघायला हवा.जेणे करुन स्री च्या व्यथा अन् कथा आमने सामने समजून उमजून घेता येईल.
मला बाई पण भारी देवा या चित्रपटातील एक दृश्य खटकले अन् ते म्हणजे प्रौढ वयातील, वार्धक्याच्या उंबरठ्यावर असणाऱ्या महिला फार काही ठोस कारण नसताना दारू पिताना दाखवल्या आहेत ते..! या दृष्याची गरज होती का हा प्रश्न पडतो.असो चित्रपट निर्माण करणाऱ्याचा काय हेतू असेल तो त्यांनाच ठाऊक..!
बाकी आदरणीय केदार भाऊ शिंदे यांनी स्री च्या कथा अन् व्यथा छान प्रकारे बाई पण भारी देवा द्वारे सादर केल्या आहेत, त्याबद्दल त्यांच्यातील उत्तम दिग्दर्शकाला दाद..!👌
वंदे मातरम्
एक रसिक - नंदन शोभाबाई विष्णुपंत जाधव.©️
https://jadhavnandan.blogspot.com/?m=1
(© सदरील लेख कॉपीराइट केलेला असून लेखाचे संपूर्ण हक्क लेखकाकडे आहेत.)
दिनांक - २३ जुलै २०२३, रविवार.
