मला प्रवासात भेटलेली माणसं ©️
" ये बनारस हैं..! "
🕉️ " दर्शन, काशी विश्वनाथ महादेवाचे ..! " 🕉️
( भाग क्रमांक -२ )
=============================
माणसाचं आयुष्य ज्यावेळी पूर्णविराम शोधत असते त्यावेळी त्याच्या आयुष्यातील अनेक स्वल्पविराम त्याला कधी प्रश्नचिन्ह तर कधी उद्गारवाचक चिन्ह बनून खुणावत असतात.ज्यावेळी आपण काशी स्थित परिसरात भ्रमंती करतो,त्यावेळी तिथलं आयुष्य , सतत आपल्यातील अनेक प्रश्नचिन्ह तसेच उद्गारवाचक चिन्हांच निराकरण करत असते.
दिनांक ४/१/२०२२ रोजी आम्ही गंगा स्नान व माझ्या तीर्थरूप वडिलांचे वर्षश्राध्द विधी आटोपून काशी विश्वनाथ महादेवाच्या दर्शनाला निघालो होतो. वाराणसी, गल्ली अन् गर्दी यांचं अतूट नातं पदोपदी दिसत होते.गर्दीतील प्रत्येक माणूस आपापल्या कामात मग्न होता.आमच्या सारखे असंख्य प्रवासी आपापल्या परीने घाईत दिसत होते.वाराणसी अन् गर्दी यांचं अतूट नातं पदोपदी दिसून येत होते.काही दिवसापूर्वीच भारताचे महान पंतप्रधान आदरणीय नरेंद्र मोदीजी यांच्या कर कमलाद्वारे ज्या पवित्र सांस्कृतिक अस्तित्वाचं पूजन केले होते त्या श्रध्येयाच्या दर्शनाची ओढ लागली होती. जुन्याच गल्लीतून काशी विश्वनाथ महादेव मंदिराच्या दर्शनाला निघालो होतो.मुख्य तपासणी कक्षा जवळ आलो होतो.तिथल्या सुरक्षा अधिकाऱ्यांनी सांगितले की, मोबाईल मुख्य मंदिर परिसरात नेता येणार नाही.आम्ही त्यांच्या अटींचे पालन करत बाजूलाच असलेल्या एक दुकानातील लॉकर मध्ये मोबाईल ठेवून बेलाची पानं अन् इतर पूजेचं साहित्य घेऊन पुढे निघालो होतो.
काशी विश्वनाथ कॉरिडॉर मध्ये प्रवेश केल्या केल्या एका वेगळ्याच अध्यात्मिक अनुभूतीचा अनुभव यायला लागला होता. माझ्या पालखेड जन्मगावात ज्या श्री.पारेश्वर महादेवाची आत्मिक आस्था मनी बाळगून होतो, तोच पारेश्र्वर महादेव ,काशी येथे भेटणार याची ओढ लागली होती. काशी विश्वनाथ कॉरिडॉर मध्ये प्रवेश केल्या केल्या तिथलं भव्य स्वरूप पाहून मन अतिशय प्रसन्न झाले होते.मी यापूर्वी माझ्या स्वर्गीय आईच्या वर्षश्राध्दाच्यावेळी काशी विश्वनाथ महादेव मंदिराला सहपरिवार भेट दिली होती. त्यावेळी सर्वत्र दाटीवाटीने वसलेला परिसर नजरेच्या स्मरणात येत होता.मी यापूर्वी प्रत्यक्ष सहपरिवार बघितलेला काशी विश्वनाथ महादेव मंदिर परिसर अन् आत्त्ताचा अतिशय विस्तीर्ण, सुनियोजित परिसर यात कमालीचा बदल जाणवत होता.
काशी विश्वनाथ कॉरिडॉर मध्ये प्रवेश केल्या केल्या समोर विस्तीर्ण सुनियोजित परिसर नजरेत भरला.सर्वत्र कमालीची श्रद्धा बाळगून असणारी माणसं वावरत होती.चौरसाकृती परिसरात मधोमध काशी विश्वनाथ महादेव आपल्या मंदिरात विराजमान होते. सर्व भाविक श्रद्धेने रांगेत काशी विश्वनाथ महादेवाच्या दर्शनाला हळूहळू पुढे पुढे सरकत होते.मुख्य मंदिर गाभाऱ्याच्या परिसरात आल्यावर उत्पत्ती, स्थिती आणि लय यातील लय म्हणजेच शेवट याचं माणसाच्या आयुष्यात प्रतिनिधीत्व करणारं तेज आमच्या समोर आले होते.ज्याला जन्म आहे त्याचा कधी ना कधी लय होणारच या शाश्वत सत्याचं अस्तित्व आमच्या समोर दिसत होते.काशी विश्वनाथ महादेवाची पवित्र पिंड आमच्या नजरेच्या कक्षेत आली होती. काशी विश्वनाथ महादेवाची पवित्र पिंड आमच्या नजरेच्या कक्षेत आली अन् त्याचवेळी माझ्या अंतर्मनात आई अहिल्याबाई होळकर यांचं पवित्र स्मरण झाले..! आज जी काशी विश्वनाथ महादेवाची पवित्र पिंड आम्ही बघत होतो, त्याच्या आजच्या अस्तित्वाला जी माऊली निमित्त होती ती आई अहिल्याबाई होळकर श्रद्धेने स्मरणात येत होती.माझ्या अंतर्मनात एकाच वेळी काशी विश्वनाथ महादेव अन् आई अहिल्याबाई होळकर श्रद्धेने येत होते.यातील काशी विश्वनाथ महादेव समोर दिसत होते तर आई अहिल्याबाई होळकर यांचं त्याच श्रद्धेने माझ्या हृदयात त्यांचं पूजन सुरू होते.आज माझ्या समोर दिसत असणाऱ्या काशी विश्वनाथ महादेवाच्या दार्शनिक अस्तित्वाला जी माऊली निमित्त होती तिचं स्मरण ,अगदी काशी विश्वनाथ महादेवाच्या पवित्र स्मरणा एवढेच सर्वोच्च स्थान माझ्या हृदयात सुरू होते.आपल्या प्रत्येक माणसाच्या आयुष्यात आईचे स्थान काय असते याची प्रत्यक्ष अनुभूती मी याचि देही याचि डोळा घेत होतो. आई अहिल्याबाई होळकर नसत्या तर काशी विश्वनाथ महादेवाच्या आजच्या भौतिक पिंडीच्या अस्तित्वालाच आपण नक्कीच मुकलो असतो याची सतत जाणीव होत होती.दर्शन रांगेत असताना व दर्शन घेताना मी मोठ्याने घोषणा दिली " हर हर महादेव..!" माझ्या पाठोपाठ इतर भक्तांनी देखील " हर हर महादेव..!" अशी घोषणा दिली.
अखेर आमच्या समोर काशी विश्वनाथ महादेवाची पिंड नजरेत आली होती. काशी विश्वनाथाला श्रद्धेने डोळयात सामावून घेतलं. आपल्या आई अहिल्याबाईने याच काशी विश्वनाथाला श्रद्धेने जपून ठेवलं याचं आत्मिक समाधान लाभले होते.काही श्रध्येयांचे दर्शन झाले की आंतरिक ऊर्जा निर्माण होते तोच अनुभव काशी विश्वनाथाच्या दर्शनाने लाभला होता.मुख्य मंदिर गाभाऱ्यातून आम्ही बाहेर पडलो होतो. खूप विस्तीर्ण सुनियोजित परिसराच्या मधोमध काशी विश्वनाथ महादेव मंदिर अगदी कपाळावरील भस्माच्या मधोमध लावलेला केशरी गंधासारखे उठून दिसत होते.मुख्य मंदिराच्या आवारात सर्वत्र कमालीची स्वच्छ्ता नजरेत भरत होती. आम्ही काशी विश्वनाथ महादेव मंदिर परिसरातील ज्ञानवापी विहिरीच्या जवळ आलो होतो.तिथे पुरातन नंदीची मूर्ती दिसून आली. पुरातन नंदीचे मुख, ज्या दुसऱ्या बाजूला लगतच मशीद आहे तिकडे होते. नंदीचे श्रद्धेने दर्शन घेतले. प्रत्येक शिवमंदिरात नंदीचे मुख महादेवाच्या पिंडीकडेच असते हे विशेष..! पुरातन नंदीच्या बाजूलाच ज्ञानवापी विहीर दिसून आली.शिवभक्त श्रद्धेने त्या ज्ञानवापी विहिरीचे दर्शन घेत होते.आम्हीही श्रद्धेने दर्शन घेतले.तेथील सेवेकरींना या विहिरीविषयी माहिती विचारली असता त्यांनी सांगितले की, औरंगजेबाने ज्यावेळी काशी विश्वनाथ महादेव मंदिराला क्षति पोहोचविली त्यावेळी काही भक्तांनी मूळ काशी विश्वनाथ महादेवाच्या पिंडीचे याच ज्ञानवापी विहिरीत सुरक्षितपणे विसर्जन केले आहे.त्यामुळे या ज्ञानवापी विहिरीचे शिवभक्तांच्या हृदयात खूप श्रद्धास्थान आहे.
आमचे दर्शन आटोपले होते.मी माझ्या सोबत संत जनार्दन स्वामी मौनगिरी महाराज यांची विविध मंत्र असलेली विधी पुस्तिका सोबत आणलेली होती.काशी विश्वनाथ महादेव मंदिर परिसरातील कडेच्या बाजूला आम्ही निवांत बसलो होतो.मी श्रद्धेने विधी पुस्तिका वाचत बसलो होतो. बराचसा भाग मुखोदगत असल्याने डोळे मिटून मंत्राचे उच्चारण सुरू केले होते.ज्यावेळी पालखेड येथील ग्रामदैवत श्री.पारेश्वर महादेवाच्या मंदिरात पुजारी नव्हते त्यावेळी मी अन् आमच्याच पालखेड गावातील आदरणीय सदाशिव आण्णा पाटील जगताप ( कृषी सहायक अधिकारी ) आम्ही ज्या श्रद्धेने दररोज पहाटे मंदिरात मंत्रोच्चारात महादेवाचे पूजन केले होते त्याची पुनश्च अनुभुती येत होती. आमची विधी पूजा आटोपली होती.आम्ही सर्वांनी साष्टांग दंडवत घालून काशी विश्वनाथ महादेवाला प्रणाम केला.
संपूर्ण मंदिर परिसर फिरत असताना आम्ही, ज्याठिकाणी उभा राहून भारताचे महान पंतप्रधान आदरणीय नरेंद्र मोदी यांनी याच काशी विश्वनाथ महादेव कॉरिडॉरचे उद्घाटन प्रसंगी भाषण केले होते त्या ठिकाणी आलो होतो.एका महान सुसंस्कृत व्यक्तिमत्त्वाने या आजच्या भव्य अन् दिव्य स्वरूपात दिसणाऱ्या काशी विश्वनाथ महादेव मंदिराला आपल्या सर्वांच्या समोर प्रस्तुत केले होते.त्याक्षणी अंतर्मनातून वंदनीय नरेंद्र मोदी यांना वंदन केले..! उर्वरित परिसरात अजुन सुशोभीकरण सुरू होते.तिकडे जाण्यास परवानगी नव्हती. सुशोभीकरण सुरू असणाऱ्या याच परिसरात आई अहिल्याबाई होळकर यांच्या पवित्र पुतळ्याचे दर्शन घेण्याचे राहून गेले.भविष्यात जेंव्हा जाऊ तेंव्हा आई अहिल्याबाईचे दर्शन नक्कीच होईल ,कारण सध्याच्या काशी विश्वनाथ महादेवाच्या अस्तित्वाला हीच माऊली निमित्त होती..!
हर हर महादेव..!🕉️
वंदे मातरम्..!
लेखक : नंदन शोभाबाई विष्णुपंत जाधव.
https://jadhavnandan.blogspot.com/?m=1
(© सदरील लेख कॉपीराइट केलेला असून लेखाचे संपूर्ण हक्क लेखकाकडे आहेत.)
दिनांक -१३/२/२०२२, रविवार.
क्रमशः
कोणत्याही टिप्पण्या नाहीत:
टिप्पणी पोस्ट करा