चिंतन
" वारकरी बंधुची, मोफत दाढी सेवा ..! "
================================
आपल्या महाराष्ट्रात हिंदू धर्मातील महान वारकरी संप्रदायात, धार्मिक उत्सवांमध्ये प्रत्येकजण ,आपापल्या क्षमतेनुसार ,कौशल्याने समाजसेवेचे योगदान देण्याची महान परंपरा आजतागायत राखून आहे..! मला याची प्रचीती ह.भ.प.गंगागिरी महाराज अखंड हरिनाम सप्ताह,मुंबई-नागपूर, लासूर स्टेशन महामार्गालगत इ.स.२०१७ साली साजरा झालेल्या धार्मिक उत्सव स्थळी आली होती..!
मी त्यावेळी लासूर स्टेशन येथे राहत होतो.सदरील अखंड हरिनाम सप्ताह स्थळ,लासूर स्टेशन पासून ५ किलोमीटर अंतरावर आयोजित करण्यात आला होता.मी सहपरिवार दररोज संध्याकाळी एक स्वयंसेवक या नात्याने तिथं शाळेतून आल्यावर जात होतो.सप्ताहाच्या पहिल्याच दिवशी केशकर्तन करणाऱ्या वारकरी बंधूने सप्ताह स्थळी येणाऱ्या भाविक भक्तांची दाढी करून देण्याकरिता अगदी मोफत सेवा सुरू केली होती..!सदरील केश कर्तन दुकान फार काही आलिशान नव्हते,पण ही सेवा पुरविणाऱ्या सेवेकरी माणसाची मनाची श्रीमंती जगातील सर्वोत्तम श्रीमंती नक्कीच जाणवत होती..! या सेवेकरी बंधूने याच हरिनाम सप्ताह स्थळी नुसते इकडून तिकडे अन् तिकडून इकडे फिरणाऱ्या काही सफेदपोष असणाऱ्यांना आपल्या कृतीतून चपराक लगावली होती .! आसपास ही सेवा पुरविणारे बंधू दिसतात का याचा शोध घेतला पण खूप खूप गर्दीमुळे दिसले नाही..! मला पण पंगत वाढायला जायची घाई असल्याने मी लवकर तिथून निघालो.
दुसऱ्या दिवशी शाळेतून घरी आल्यावर हात पाय तोंड धुवून पुन्हा त्याच स्थळी गेलो असता तिथं सदरील वारकरी बंधूची मोफत केश कर्तन सेवा दुकान दिसले नव्हती..! बहुदा त्या हरिनाम सप्ताह स्थळी ऐन मधोमध सदरील दुकान लावल्याने कुणीतरी त्यांना दुसऱ्या जागी दुकान लावायला सांगितले असेल..!
पूर्णत:समर्पण भावनेने,आपल्या क्षमतेनुसार,कौशल्यानुसार
" सेवा " करणा-या त्या सेवेकरीचे कार्य बघून या महान वारकरी संप्रदायातील सेवेकरी परंपरेची प्रत्यक्ष बघून खात्री पटली..!
आज दिनांक १२ जुलै २०१९ रोजी आषाढी एकादशी आहे..! त्यानिमित्त या महान परंपरेला सर्व सामान्य वारकरी बंधू भगिनी ,अनेक संतजन यांनी आपापल्या परीने,सर्व सामान्य माणसा करिता याचे दारे उघडी केलेली आहे...!
त्या सर्वांना विनम्र वंदन..!
वारकरी सांप्रदाय याचमुळे श्रेष्ठ आहे..!
वंदे मातरम्..!
जय हरी माऊली..!
लेखक: नंदन शोभाबाई विष्णुपंत जाधव पालखेडवाले.
https://jadhavnandan.blogspot.com/?m=1
(© सदरील लेख कॉपीराइट केलेला असून लेखाचे संपूर्ण हक्क लेखकाकडे आहेत.)
सदरील छायाचित्र स्थळ: ह.भ.प.गंगागिरी महाराज अखंड हरिनाम सप्ताह,मुंबई-नागपूर, लासूर स्टेशन, जि.औरंगाबाद महामार्ग
इ.स.जुलै- ऑगस्ट २०१७
दिनांक: १२ जूलै २०१९, आषाढी एकादशी.
कोणत्याही टिप्पण्या नाहीत:
टिप्पणी पोस्ट करा